“Azərbaycan Sənaye Korporasiyası” ASC-nin rəsmi internet səhifəsində “Startap müraciət forması” adlı bölmə istifadəyə verilib
Ölkədə innovativ ideyaların uğurlu biznes sahəsinə çevrilməsinə yardım etmək, həmçinin yeni ideyaların yaradılması, innovativ sahibkarlığın təşviqi məqsədilə “Azərbaycan Sənaye Korporasiyası” ASC tərəfindən mütəmadi olaraq startap layihələrinin inkişafına yaxından dəstək göstərilir. Korporasiyanın nümayəndələri ilə ölkəmizdə fəaliyyət göstərən “Dr.Agro”, “Satelyzer”, “EdTesk”, “ButaNFT”, “HealWith” startapları ilə əməkdaşlıq əlaqələrinin müzakirəsinə dair bir sıra görüşlər keçirilmişdir. Bu istiqamətdə görülən tədbirlərin davamı olaraq “Azərbaycan Sənaye Korporasiyası” ASC-nin rəsmi internet səhifəsində “Startap müraciət forması” adlı bölmə istifadəyə verilmişdir. Bu müraciət forması sayəsində startapçılar öz layihələrini geniş ictimaiyyətə təqdim etmək, startap konsepsiyalarını və ya layihələrini daha inkişaf etdirmək, kənd təsərrüfatı, metallurgiya və digər müvafiq tətbiq sahələrinə çıxış əldə etmək, startapların idarə edilməsi və təkmilləşdirilməsi istiqamətində bilik və təcrübə qazanmaq imkanı əldə edəcəklər. Müraciət üçün (http://ask.gov.az) saytında qeydiyyatdan keçmək lazımdır.
