“Azərbaycan Sənaye Korporasiyası” ASC-nin əməkdaşları beynəlxalq dərəcəli sertifikata layiq görülüb

“Azərbaycan Sənaye Korporasiyası” ASC-nin Maliyyə departamentinin  Maliyyə hesabatları şöbəsinin müdiri Tale Həsənov “Layihələrin İdarə Edilməsi” (PMP) sertifikasiya imtahanından uğurla keçərək, qlobal səviyyədə tanınan “Layihələrin  İdarəedilməsi Mütəxəssisi” statusuna və həmin statusu təsdiqləyən sertifikata layiq görülüb. Sertifikasiya imtahanı  Amerika Birləşmiş Ştatlarında yerləşən və layihələrin idarə edilməsi üzrə beynəlxalq standartların hazırlanmasında ən böyük və nüfuzlu  qurum olan “Layihə İdarəetmə İnstitutu” (Project Management Institute) tərəfindən təşkil olunub.

Qeyd olunan sertifikat üzrə əldə olunan biliklər layihələrin peşəkar səviyyədə və beynəlxalq təcrübəyə əsasən idarə edilməsi, layihənin təşkilatın məqsədlərinə və hədəflərinə uyğunluğunun müəyyənləşdirilməsi, eləcə də biznes təhlillərin aparılması, layihənin maliyyə idarəetməsinin təşkili, resursların effektli şəkildə istifadəsi, layihə müddətində yaranmış risklərin idarə edilməsi, həmçinin layihənin maraqlı tərəflərinin gözləntilərinə uyğun idarə edilməsi, maraqlı tərəflə kommunikasiyanın qurulması və layihə nəticəsində yaranmış dəyərlərin biznes proseslərə transfer edilməsi baxımından əhəmiyyət daşıyır.

“Azərbaycan Sənaye Korporasiyası” ASC-nin Maliyyə Departamentinin  digər  əməkdaşı  Aynur Kərimova isə Beynəlxalq Maliyyə Hesabatlarının Standartları üzrə sertifikasiya prosesindən uğurla keçərək, ACCA F7 (FR) sertifikatına layiq görülüb. Bu sertifikat maliyyə hesabatlarının hazırlanması və hazırlanmış hesabatlarda   standartlar üzrə təhlillərin aparılmasında  xüsusi əhəmiyyətə malikdir.