“Azərpambıq Aqrar Sənaye Kompleksi" xalis mənfəətini kəskin artırıb
"Azərbaycan Sənaye Korporasiyası" ASC-yə məxsus “Azərpambıq Aqrar Sənaye Kompleksi” MMC 2019-cu ili 3,568 milyon manat xalis mənfəətlə başa vurub.
“Report” şirkətin maliyyə hesabatına istinadən xəbər verir ki, bu, 2018-ci illə müqayisədə təxminən 209 dəfə çoxdur.
2019-cu ildə “Azərpambıq”-ın satış hesabına əsas əməliyyat gəlirləri 60,229 milyon manat (2018-ci ilə nisbətən 647,6 dəfə çox), satışının maya dəyəri 48,76 milyon manat (886,5 dəfə çox), kommersiya xərcləri 559 min manat (2018-ci ildə olmayıb), inzibati xərcləri 5,657 milyon manat (628,6 dəfə çox), sair əməliyyat xərcləri 395 min manat (51,2 dəfə çox), maliyyə mənfəəti 277 min manat (2018-ci ildə olmayıb), fövqəladə zərəri 540 min manat (2018-ci ildə olmayıb), mənfəət vergisi ödəmələri isə 1,027 milyon manat (256,8 dəfə çox) təşkil edib.
2020-ci il yanvarın 1-nə “Azərpambığ”ın aktivləri 168,171 milyon manat olub ki, bu da illik müqayisədə 3,9 dəfə çoxdur. Hesabat dövründə şirkətin öhdəlikləri 26,6% azalaraq 31,704 milyon manata düşüb, balans kapitalı isə kəskin artaraq 17 min manatdan 136,468 milyon manata, o cümlədən nizamnamə kapitalı kəskin artaraq 100 manatdan 132,882 milyon manata çatıb.
Xatırladaq ki, “Azərpambıq Aqrar Sənaye Kompleksi” 2018-ci ildə yaradılıb. Cəmiyyət pambıq istehsalı, tədarükü, emalı və emaldan alınan məhsulların (pambıq mahlıcı, texniki çiyid, pambıq yağı, köməkçi məhsullar, çiyid cecəsi və s.) satışı ilə məşğul olur. Onun tərkibində 6 pambıq emalı zavodu (Şirvan, Saatlı, Ağcabədi, Beyləqan, Bərdə, Biləsuvar), 6 pambıq istehsalı və tədarükü məntəqəsi (Sabirabad, İmişli, Salyan, Ağdam, Tərtər, Goranboy), Biləsuvar rayonunda yerləşən Təcrübə-Sınaq Təsərrüfatı fəaliyyət göstərir.
