Qərbi Kaspi Universitetinin tələbələri “Azərpambıq Aqrar Sənaye Kompleksi” Məhdud Məsuliyyətli Cəmiyyətində təcrübə keçiblər
“Azərbaycan Sənaye Korporasiyası” ASC ilə Qərbi Kaspi Universiteti arasında birgə əməkdaşlığa imza atılıb.
Praktiki əlaqələrin genişləndirilməsinə xidmət edən bu əməkdaşlıq çərçivəsində Universitetin Sənayenin təşkili və idarəolunması ixtisasının 4-cü kurs tələbələri “Azərpambıq Aqrar Sənaye Kompleksi” Məhdud Məsuliyyətli Cəmiyyətinin İstehsal və fermerlərlə iş, Emal, Maliyyə və uçot şöbələrində təcrübə keçiblər.
Təcrübə zamanı tələbələr Cəmiyyətin fəaliyyəti ilə yaxından tanış olub, buradakı istehsal və emal prosesləri haqqında ətraflı məlumat alıblar. Tələbələrin praktiki təlimlərə, tədris təcrübəsinə cəlb edilməsi, mütəxəssis kimi yetişdirilməsi və onlarda həmin sahəyə maraq oyadılması baxımından əhəmiyyət daşıyan bu əməkdaşlıq kənd təsərrüfatı üzrə peşəkar kadrların hazırlanmasında əhəmiyyətli rola malikdir.
Təcrübə proqramının sonunda tələbələri fərqləndirmək, gələcək iş fəaliyyətində həvəsləndirmək məqsədi ilə “Azərpambıq Aqrar Sənaye Kompleksi” MMC tərəfindən onlara sertifikat və xasiyyətnamələr təqdim olunub.
Qərbi Kaspi Universitetinin rəhbərliyi də öz növbəsində tələbələrin təcrübə prosesini uğurla təşkil etdiyinə görə Cəmiyyətin İnsan resursları şöbəsinin müdiri Günay Məmmədova və İnsan resursları üzrə böyük mütəxəssisi Fatimə Kərimovanı təşəkkürnamə ilə təltif edib və məhsuldar əməkdaşlığın uğurla davam etdirilməsindən məmnunluq hissi duyduqlarını ifadə ediblər.
Fotolent
